Kristinn: Skil sáttur við Breiðablik

Kristinn Steindórsson hélt í gær utan til Svíþjóðar til að skrifa undir þriggja ára samning við Halmstad. Hann ákvað fyrr í haust að leita sér að liði utan landsteinanna og segir að fleiri lið hafi verið í myndinni. Forráðamenn Halmstad hafi hins vegar sýnt mestan áhuga sem réði úrslitum.

„Það skiptir auðvitað mjög miklu máli en ég tel líka að þetta sé fínn staður til að hefja atvinnumannaferilinn," sagði Kristinn sem er 21 árs gamall sóknarmaður. Hann hefur þó áorkað mikið hjá uppeldisfélagi sínu, Breiðabliki, og orðið til að mynda bæði Íslands- og bikarmeistari. Í sumar varð hann svo markahæsti leikmaður liðsins í efstu deild frá upphafi og stendur það met nú í 35 mörkum.

Halmstad féll úr sænsku úrvalsdeildinni í haust en nú rétt fyrir jól samdi annar

íslenskur sóknarmaður, Guðjón Baldvinsson, við félagið. Fyrir er Jónas Guðni Sævarsson á mála hjá Halmstad. „Þetta er fín deild en ekki of stór fyrir mitt fyrsta skref í atvinnumennsku. Ég vil frekar fá að spila en að dúsa á bekknum hjá sterkara liði. Það skemmir heldur ekki fyrir að hafa þá Guðjón og Jónas með mér."

Aðdragandinn að félagaskiptunum hefur verið nokkuð langur hjá Kristni en samningur hans við Breiðablik rann út í október. Blikar eiga þó rétt á uppeldisbótum fyrir Kristinn og var því samið um kaupverð.

„Stefnan var alltaf sett á að komast út og var ég því ekki að skoða neitt hér heima. Óvissan var þó nokkur og óþægilegt að vita ekki hvað tekur við. Ég hef verið í ágætu fríi í haust og hlakka til að komast út til að hefja æfinga með nýju liði."

Hann segist vera sáttur á þessum tímamótum á sínum unga ferli. „Ég hef unnið flest það sem hægt er að vinna með Breiðabliki allt frá því í yngri flokkunum. Það var gaman líka að ná metinu í sumar og ég tel þetta hentuga tímasetningu fyrir næsta áskorun. Ég skil sáttur við leikmenn og þjálfara Breiðabliks," segir Kristinn.