Icesave afgreitt í ósætti út úr fjárlaganefnd

Þingmenn stjórnarandstöðunnar telja að stjórnlagaþingsmálið hafi orðið til þess að Icesave frumvarpið hafi verið afgreitt í ósætti út úr fjárlaganefnd.

Icesave frumvarpið var afgreitt úr fjárlaganefnd í gær. Fulltrúar stjórnarandstöðunnar voru ósáttir við þessa afgreiðslu en þeir höfðu óskað eftir meiri tíma til að fjalla um málið.

Höskuldur Þórhallsson, fulltrúi framsóknarflokks, í fjárlaganefnd, sagði í samtali við fréttastofu í gær að niðurstaða hæstaréttar í stjórnlagaþingsmálinu hafi haft áhrif afstöðu stjórnarliða í málinu. Vísar hann til þeirra ummæla sem féllu á Alþingi eftir ákvörðun hæstaréttar lá fyrir.

„Það var einhver óróleiki kominn í meirihluta fjárlaganefndar ætli það helgast ekki af atburðum gærdagsins, svo ég reyni nú að rýna aðeins í það. En mér fannst það mjög dapurlegt að þeir skyldu ákveða að rífa málið út í ósætti," segir Höskuldur.

Undir þetta tekur Þorgerður Katrín Gunnarsdóttir, fulltrúi sjálfstæðiflokks í nefndinni, sem segir að samstarfið hafi gengið mjög vel þangað til í gær.

„Það er ákveðin tortryggni í gangi. Framkoma forsætisráðherra í gær hjálpaði ekki mikið upp á það að menn leiti samráðs og sátta. Þetta hjálpaði ekki til nei," sagði hún.

Ekki náðist í Oddnýju G Harðardóttur, formann fjárlaganefndar né Björn Val Gíslason, varaformann fjárlganefndar, í morgun.