Lífið

Íslendingar fá ekki nóg af Glæstum vonum

Álfrún Pálsdóttir skrifar
Norðmenn hafa ákveðið að slá þættina Bold and the Beautiful af dagskrá vegna minnkandi áhorfs. Á Íslandi eru þættirnir mjög vinsælir og vikulega horfir um 31,1% áskrifenda Stöðvar 2 á sápuóperuna.
Norðmenn hafa ákveðið að slá þættina Bold and the Beautiful af dagskrá vegna minnkandi áhorfs. Á Íslandi eru þættirnir mjög vinsælir og vikulega horfir um 31,1% áskrifenda Stöðvar 2 á sápuóperuna.

„Þessir þættir eru einfaldlega of vinsælir hérna til að hætta sýningum á þeim,“ segir Pálmi Guðmundsson, framkvæmdastjóri dagskrársviðs Stöðvar 2, um sápuóperuna Bold and the Beautiful.

Norðmenn hafa ákveðið að taka sápuóperuna Glæstar vonir, eða Bold and the Beautiful, af dagskrá sjónvarpsins eftir 18 ár á skjánum. Aðalástæðan segja forsvarsmenn sjónvarpsstöðvarinnar TVNorge vera dalandi áhorfstölur og segja að sú þróun sé svipuð annars staðar í heiminum. Pálmi segir það ekki vera raunin hjá íslenskum áhorfendum en vikulega horfir um 31,1% áskrifenda Stöðvar 2 á sápuóperuna frægu.

„Bold and the Beautiful og Nágrannar eru vinsælustu dagskrárliðirnir okkar á dagtíma og áhorfið hefur ekkert dalað á þeim undanfarið.“

Mikil mótmæli áttu sér stað meðal aðdáenda þáttanna í Noregi og fylltust pósthólf forsvarsmanna sjónvarpsstöðvarinnar af bréfum þar sem norskir aðdáendur grátbáðu þá um að endurskoða afstöðu sína. Sápuóperunni hefur því verið gefinn þriggja mánaða prufutími á netinu, þar sem hver þáttur verður seldur gegn vægu gjaldi fyrir hörðustu aðdáendurna. Ef það fyrirkomulag stendur ekki undir væntingum verða þættirnir slegnir af í Noregi.

Glæstar vonir hafa verið á dagskrá Stöðvar 2 frá árinu 1995 og eiga sér dyggan hóp aðdáenda að sögn Pálma. „Það hefur aldrei verið umræða um að slá þættina af hér enda mundum við örugglega líka fá að heyra það frá áhorfendum þáttanna.“






Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.