Allar 68 umsóknirnar um frest samþykktar

Allar 68 umsóknir banka um að fá að eiga fyrirtæki í óskyldum rekstri lengur en í 12 mánuði voru samþykktar. Þetta staðfestir Fjármálaeftirlitið (FME). Afar mismunandi er þó hversu langir veittir frestir eru.

Alls eru 137 félög í óskyldri starfsemi í eigu íslenskra banka í dag. Þetta kemur fram í svari FME við fyrirspurn Félags atvinnurekenda (FA). Samkvæmt lögum mega bankar einungis eiga fyrirtæki í óskyldri starfsemi í 12 mánuði án þess að leita eftir undanþágu vegna þess eignarhalds hjá FME. Dæmi eru um að bankar eða dótturfélög þeirra hafi átt fyrirtæki sem keppa á samkeppnismarkaði í meira en 30 mánuði. Þau tímamörk voru sett inn í lög um fjármálafyrirtæki í fyrrasumar. Frá og með 25. júní 2011 hafa bankar þurft að sækja um undanþágu til að eiga fyrirtæki í lengri tíma en ár. FME hefur haft virkt eftirlit með því að þessu sé hlýtt og Gunnar Andersen, forstjóri eftirlitsins, sagði í Fréttablaðinu á miðvikudag að það væri tilbúið að beita viðurlögum gegn bönkum sem draga að selja fyrirtæki í óskyldum rekstri.

Almar Guðmundsson, framkvæmdastjóri FA, segir mjög gott að þessar upplýsingar séu komnar fram. Það séu þó ákveðin vonbrigði að fyrirspurnum félagsins sé ekki svarað að fullu, en þau vildu meðal annars fá að vita hvaða tímafrestir hafi verið veittir og hvort þeir hafi verið framlengdir. „Okkur finnst mjög mikilvægt að þessi tölfræði sé öll birt. Við teljum að það sé mikill skortur á nánari svörum varðandi tímafrestina. Það kemur fram að 68 umsóknir um aukinn frest hafa borist eftirlitinu. Við vitum hins vegar ekki hversu langur frestur var gefinn.“

Í svarbréfinu neitar FME að „veita upplýsingar um hve langir frestir hafa verið veittir né hvaða fyrirtæki hafa fengið samþykki eftirlitsins um aukinn frest þar sem slíkar upplýsingar eru til þess fallnar að skaða þann markað sem fyrirtækin starfa á“.

Eftirlitið rökstyður þessa afstöðu sína með því að aukin hætta sé á að hugsanlegir fjárfestar í fyrirtækjunum myndu einfaldlega bíða þar til sá frestur sem FME veitti rynni út og freista þess að kaupa fyrirtækið „er það er neytt í sölu“.

thordur@frettabladid.is