Nauðsynlegt að efla neyðarsjóð ESB

Antonio Borges, yfirmaður Evrópudeildar Alþjóðagjaldeyrissjóðsins, segir nauðsynlegt að neyðarsjóður ESB verði efldur til muna og honum verði heimilað að leita fleiri úrræða en til þessa.

Hann dró hins vegar til baka yfirlýsingar sínar, frá því fyrr í gær, um að AGS geti gripið inn í á verðbréfamörkuðum til að koma í veg fyrir að stór hagkerfi á borð við Ítalíu og Spán riði til falls í kreppunni.

„Við höfum yfir margvíslegum úrræðum að ráða sem hægt væri að grípa til í þeim tilgangi að endurvekja trú á þessi ríki,“ sagði Borges á ráðstefnu í Brussel í gær, en lagði mikla áherslu á að ESB verði nú að grípa til ráða sem duga.

Sjóðurinn hefur til þessa lagt nærri 80 milljarða evra, eða nærri 13.000 milljarða króna, fram til björgunaraðgerða á evrusvæðinu, en það er nærri þriðjungur þess heildarfjármagns sem notað er til aðstoðar Grikklandi, Írlandi og Portúgal.

Sjóðurinn hefur hins vegar ekki blandað sér í viðskipti á mörkuðum, þótt bæði hafi Seðlabanki Evrópusambandsins gert það undanfarið og einnig muni neyðarsjóður ESB grípa til slíkra aðgerða á næstu mánuðum.

Sívaxandi ótti við greiðsluþrot Grikklands með keðjuverkunum til annarra evruríkja, jafnvel Ítalíu og Spánar, hefur grafið mjög undan tiltrú á evrunni.

„Í þessari stöðu er ekki hægt að útiloka möguleikann á því að efnahagslífið taki stefnuna niður á við, og að önnur kreppa geti orðið,“ sagði Borges.

Auk þess gaf Olli Rehn, efnahagsmálastjóri framkvæmdastjórnar ESB, í skyn í viðtali við Financial Times í gær að endurfjármögnun banka sé nú í skoðun á vettvangi Evrópusambandsins.

Angela Merkel Þýskalandskanslari tók undir þetta, en hún hefur til þessa staðið hart á móti því að fé verði lagt úr ríkissjóðum Evrópusambandsins til að styrkja bankana.

Allt þetta varð til þess að í gær urðu nokkrar verðhækkanir á mörkuðum, sem höfðu verið í niðursveiflu eftir fréttir dagsins á undan þegar fjármálaráðherrar ESB frestuðu ákvörðunum um frekari aðstoð til Grikklands eftir að Grikkir játuðu að þeir myndu ekki ná því markmiði, að koma fjárlagahalla landsins niður í 7,5 prósent á þessu ári.

gudsteinn@frettabladid.is