Var gaurinn sem gaf aldrei boltann

KR-ingurinn Kjartan Henry Finnbogason sýndi af sér einstaka karlmennsku í leiknum gegn ÍBV á mánudag. Hann fór þá úr axlarlið í leiknum. Hann lét kippa öxlinni aftur í liðinn, kom inn á völlinn og kláraði leikinn. Það sem meira er; hann spilaði vel og tryggði KR gríðarlega mikilvægt stig með laglegu skallamarki.

„Ég fer til sjúkraþjálfara þrisvar á dag. Það er allt gert til þess að koma sér í stand fyrir leikinn. Ég er miklu verri í dag [í gær] en ég var á þriðjudag. Þetta er eins og harðsperrur. Þetta er verst tveimur dögum eftir átak," segir Kjartan Henry.

KR á gríðarlega mikilvægan leik í kvöld gegn Keflavík. Leik sem KR hefur átt inni lengi. Sigur þar kemur KR-ingum í ansi vænlega stöðu í baráttu um Íslandsmeistaratitilinn.

„Ég verð að vera klár í leikinn. Það er svo lítið eftir að ég verð að klára það sem ég byrjaði á. Það er ekkert tæpt að ég verði með. Ég ætla að vera með. Ég er búinn að leggja of mikið á mig til þess að missa af leik núna," segir Kjartan, en hann verður síðan í leikbanni á sunnudag er KR spilar gegn Fylki.

Kjartan Henry hefur ekki bara verið að glíma við axlarmeiðsli því hann fékk kinnholusýkingu í aðdraganda ÍBV-leiksins. Var settur á sýklalyf og gat ekkert æft fyrir stórleikinn í Eyjum.

„Ég hef ekkert getað tekið verkjatöflur út af sýklalyfjunum. Ég fékk sýklalyf í æð þrisvar á dag í þrjá daga fyrir ÍBV-leikinn. Ég kannski geymi verkjatöfluna þangað til fyrir leik. Þá kannski tek ég eina sterka," segir Kjartan léttur, en hann tekur ekki í mál að missa af einni einustu mínútu sem er enn í boði í sumar.

„Það er búið að tala mikið um þennan Keflavíkurleik. Við eigum hann ekkert inni og hvað þá stigin. Við höfum ekki náð góðum úrslitum upp á síðkastið og búumst við mjög erfiðum leik gegn Keflavík. Það er aldrei neitt gefins gegn Willum. Þetta er mikilvægur leikur fyrir bæði lið og verður vonandi besta skemmtun," segir Kjartan, en KR getur í fyrsta skipti í langan tíma stillt upp sínu sterkasta liði í kvöld.

Er að þroskast sem leikmaður

Kjartan Henry er næstmarkahæstur í deildinni með tólf mörk, einu marki minna en Stjörnumaðurinn Garðar Jóhannsson.

„Ég er mjög sáttur við sumarið. Hef fengið að spila alla leikina og það er gott að fá traust frá þjálfaranum. Ég hef aðeins verið að spila út úr stöðu á kantinum og það hefur gengið ágætlega og hentað liðinu vel. Mér finnst líka orðið skemmtilegt að leggja upp mörk. Hef átt nokkra fína bolta fyrir. Ég er samt svekktur að vera ekki búinn að skora meira. Ég ætti að vera kominn með fleiri mörk," segir Kjartan, en hann telur sig vera að þroskast sem leikmann.

„Ég var alltaf þekktur fyrir að vera gaurinn sem vildi aldrei gefa boltann. Ég vildi frekar skora sjálfur. Það hefur aðeins breyst og ég er farinn að hugsa meira um liðið. Það var kominn tími til."