Ridley Scott og félagar sprengja í Rangárþingi ytra

Breski leikstjórinn Ridley Scott hefur fengið leyfi til sprenginga frá 5. júlí til 1. ágúst við Dómadalsleið samkvæmt fundargerð hreppsnefndar Rangárþings ytra. Í fundargerðinni kemur jafnframt fram að aðeins verði sprengt þrjá daga innan þess tímaramma. Eftir því sem Fréttablaðið kemst næst eru sprengingarnar ekki stórar heldur eru einungis hugsaðar sjónrænt fyrir tökuvélarnar.

Guðfinna Þorvaldsdóttir, oddviti hreppsnefndarinnar í Rangárþingi ytra, staðfesti að sveitarfélagið hefði gefið kvikmyndagerðarfólkinu leyfi til að athafna sig við Dómadalsleið. „Þeir eru þarna í gosefnunum frá Heklu." Hún sagði sveitarfélagið ekki fá neitt fyrir sinn snúð annað en góða kynningu. Þá styrki nærvera þeirra þjónustuaðila á svæðinu. Hún bætir því við að íbúar í Rangárþingi kippi sér lítið upp við nærveru leikstjórans Scotts og annarra Hollywood-stjarna sem væntanlegar eru austur. „Nei, ætli þeir geri sér nokkuð grein fyrir umfanginu, menn eru líka að gera mynd og vilja örugglega ekkert vera að vekja of mikla athygli á sér."

Flugbjörgunarsveitin á Hellu sér um gæslu fyrir Ridley Scott. Svanur Sævar Lárusson, formaður sveitarinnar, staðfesti það í samtali við Fréttablaðið. Hann vísaði að öðru leyti á starfsfólk framleiðslufyrirtækisins True North sem hefur veg og vanda af komu tökuliðsins til Íslands. True North er búið að stofna fyrirtækið KOP til að halda utan um framleiðsluna hér á landi en það er gert með vísan í lög um tímabundna endurgreiðslu vegna kvikmyndagerðar á Íslandi.

Samkvæmt heimildum Fréttablaðsins gista Hollywood-stjörnurnar á Hótel Rangá á meðan tökum við Dómadalsleið stendur. Friðrik Pálsson, staðarhaldari þar, vildi ekkert tjá sig við Fréttablaðið heldur vísaði öllum spurningum yfir til True North. Á vefsíðu hótelsins kemur fram að gestum bjóðist viðamikill lúxus, eitthvað sem Óskarsverðlaunaleikkonan Charlize Theron hlýtur að gera kröfu en eins og kom fram í Fréttablaðinu í gær eru Noomi Rapace og Michael Fassbender einnig meðal leikara sem dvelja hér á landi.

freyrgigja@frettabladid.is