Vona að Íslendingar fjölmenni

Úrslitakeppni Evrópumótsins í knattspyrnu hjá U21 landsliðliðum karla fer fram í Danmörku dagana 11.-25. júní. Ísland spilar í Árósum og Álaborg og þar ríkir mikil eftirvænting.

„Þetta er stærsti íþróttaviðburður og um leið stærsti knattspyrnuviðburður sem hefur átt sér stað í Danmörku," segir Michael Jaap, kynningarfulltrúi menningar- og frístundamála hjá Árósarborg. Höfuðstöðvar mótsins verða í Árósum og þar eru menn sérstaklega spenntir. „Við leggjum ríka áherslu á að umgjörðin verði sem allra glæsilegust. Við ætlum að slá upp heljarinnar fótboltaveislu og leggjum allan bæinn undir," segir Michael.

Íslenska U21 árs landsliðið hefur aldrei náð í úrslitakeppni EM og er eftirvæntingin því ekki minni hér heima. „Þetta er eitt sterkasta landslið sem Ísland hefur átt og ég vona að það skili okkur alla leið. Draumurinn er að ná Ólympíusæti," segir Tómas Ingi Tómasson, aðstoðarþjálfari U21 árs landsliðs Íslands. Hann var um tíma atvinnumaður í fótbolta hjá AGF í Árósum og er sannfærður um að móttökurnar verði góðar.

„Það er ljóst að fjölmargir Íslendingar hafa hug á að fylgja íslenska liðinu til Danmerkur. Ég finn fyrir miklum áhuga og á von á því að fjölskyldur leikmanna mæti á staðinn. Áhuginn nær þó út fyrir það og má gera ráð fyrir því að Íslendingar heima og á hinum Norðurlöndunum komi til að fylgjast með," segir Tómas Ingi sem er ánægður með að mótið skuli haldið á Jótlandi. „Ég get hiklaust mælt með Árósum. Þetta er minnsta stórborg í heimi."

Flugleiðir bjóða upp á beint flug til Billund í sumar sem þykir góður valkostur fyrir þá sem ætla á mótið og samkvæmt forsvarsmönnum flugfélagsins er áhuginn mikill.

Ísland er í A-riðli með Danmörku, Sviss og Hvíta-Rússlandi. Keppt er í tveimur riðlum og tvö efstu liðin í hvorum riðli komast áfram í undanúrslit. Þrjú efstu liðin fá síðan þátttökurétt á Ólympíuleikunum í London árið 2012. Englendingar fá sem gestgjafar sjálfkrafa þátttökurétt og ef þeir verða í efstu þremur sætunum er ljóst að fjögur lið af átta komast áfram.

„Möguleikarnir eru því nokkuð góðir," segir Tómas Ingi.

Ferðamálayfirvöld í Árósum leggja nú allt kapp á að gera bæinn kláran fyrir mótið og utan landsleikjanna verður mikið um viðburði í bænum fyrir börn og fullorðna. Ferðamálayfirvöld gera sér sérstaklega vonir um að nágrannarnir á Íslandi fjölmenni og verða íslenskir þemadagar í bænum frá 28. maí og fram að fyrsta leik Íslands þann 11. júní.

Upphaf þeirra miðast við opnun á listaverki Ólafs Elíassonar á þaki Listasafns Árósa (ARoS Aarhus Kunstmuseum) en það myndar hringlaga manngengan regnboga með útsýni yfir alla borgina.

vera@frettabladid.is