Bjarni mun stýra Stjörnunni áfram

„Bjarni er samningsbundinn Stjörnunni og það er gagnkvæmur vilji af beggja hálfu að hann verði áfram. Það er því nokkuð ljóst að hann verður áfram þjálfari liðsins,“ segir Almar Guðmundsson, formaður knattspyrnudeildar Stjörnunnar. Stjarnan kom af öllum liðum mest á óvart í sumar og náði sínum besta árangri í efstu deild.

„Það er svolítið önnur staða hjá okkur núna. Við erum búnir að festa okkur í sessi í efstu deild og farnir að klóra i toppliðin. Auðvitað viljum við blanda okkur í slaginn næsta sumar. Við erum að fara yfir samningamál leikmanna núna og svo munum við huga að styrkingu,“ segir Almar en Daníel Laxdal hefur þegar framlengt við félagið og Stjarnan vonast til þess að festa aðra lykilmenn til lengri tíma.

Danirnir Jesper Jensen og Nikolaj Pedersen verða líklega báðir áfram hjá félaginu að sögn Almars.

„Til þess að geta tekið næsta skref þá þurfum við að styrkja okkur. Það er alveg ljóst. Við verðum engu að síður að vera skynsamir í okkar aðgerðum. Ég geri ráð fyrir að við munum reyna fyrir okkur fyrst á markaðnum hér heima áður en við skoðum erlenda leikmenn,“ segir Almar en það verður líklega auðveldara fyrir Stjörnuna að laða til sín erlenda leikmenn núna.

Bæði er liðið búið að sanna sig sem eitt besta lið landsins og svo verður komið nýtt og betra gervigras á völlinn. Grasið sem lagt var á völlinn árið 2004 er úr sér gengið fyrir nokkru en grasið sem spilað verður á næsta sumar allt annað og betra.