Skýrr býst við 900 gestum

Búist er við 900 gestum á Haustráðstefnu Skýrr sem fram fer á föstudag eftir hálfan mánuð. „Þetta er einn stærsti viðburður vetrarins hér á landi í upplýsingatækni, enda um 60 fyrirlestrar í boði á 6 mismunandi fyrirlestralínum og um þriðjungur fyrirlesara eru erlendir sérfræðingar. Ég fullyrði ófeiminn að Haustráðstefna Skýrr veitir einstæða sýn á upplýsingatækni fyrir atvinnulífið og þar geta allir fundið eitthvað við hæfi, hvort heldur stjórnendur, almennt starfsfólk... eða nördar. Við eigum í stíl við það von á um 900 gestum," segir Stefán Hrafn Hagalín, forstöðumaður samskiptasviðs Skýrr, í tilkynningu.

Lykilræðu á Haustráðstefnu Skýrr þetta árið flytur Jeff Wieland, stjórnandi hjá Facebook. Hann mun fjalla um þann starfsanda og vinnuferla, sem lagðir eru til grundvallar í menningu og uppbyggingu þessa samfélagsmiðlarisa. Wieland hefur starfað við samfélagsmiðlun hjá stórveldinu Facebook frá árinu 2006 - eða hartnær frá stofnun - og vinnur við hönnunarhlið verkefna þar.

Þess er getið í frétttilkynningu Skýrr af ráðstefnunni að Jeff á íslenska móður, þannig að tengsl hans við Ísland eru mikil, þrátt fyrir að hann hafi búið vestan hafs alla ævi. Aðra lykilræðu flytur Hilmar Veigar Pétursson, forstjóri CCP, og ræðir þar einstakt samstarfsverkefni CCP og Sony þar sem EVE Online-veröld á PC-tölvum bráðnar saman við skotleikinn Dust 514 á PlayStation3. Athygli vekur að meðal annarra fyrirlesara er Stefán Eiríksson lögreglustjóri, sem hyggst fjalla um Facebook- og Twitter-væðingu embættisins.