Tchenguiz bræður krefjast milljarða frá Kaupþingi

Tchenguiz bræðurnir reyna nú að höfða mál gegn Kaupþingi í London og segja bankann skulda þeim mörg hundruð milljarða.

Fasteignamógúlarnir Vincent og Robert krefjast tveggja milljarða punda af hinum fallna banka að því er fram kemur í breska blaðinu Telegraph í dag. Þeir krefjast þess að verða viðurkenndir sem kröfuhafar í þrotabúið þrátt fyrir að hafa skuldað Kaupþingi milljónir punda þegar bankinn féll, ef marka má lánabók bankans sem lak út á netið á sínum tíma. Sjóður sem tengist Vincent Tchenguiz hefur hins vegar gert kröfu upp á 1,6 milljarð punda og vill fá hana viðurkennda sem forgangskröfu í búið. Sjóður í eigu Róberts er ekki eins stórtækur og hefur gert kröfu upp á 500 milljónir punda. Bankinn hafnaði báðum kröfunum í fyrra.

Lögfræðingar bræðranna halda því hins vegar fram að viðskiptasamningar upp á milljónir punda hafi farið í súginn þegar bankinn féll og að Kaupþing hafi haldið rekstri sínum áfram eftir að bankinn hafi í raun verið fallinn. Blaðamaður Telegraph segir að krafa bræðranna eigi eftir að valda úlfúð í Bretlandi. Á meðan þeir standi í lagaflækjum dragist að greiða kröfuhöfum þeirra innistæður í bankanum en á meðal þeirra sem bíða eftir því að fá sitt er breska ríkið og fjölmörg sveitarfélög á Englandi.

Málið var tekið fyrir í Lundúnum í gær þar sem lögmenn bankans höfnuðu kröfum bræðranna og bentu á að málið ætti heima frammi fyrir íslenskum dómstólum en ekki breskum. Að sögn Telegraph hafa þeir reyndar líka höfðað svipað mál hér á landi. Róbert Tchenguiz var á sama tíma einn stærsti viðskiptavinur Kaupþings misserin fyrir hrun og stjórnarmaður í stærsta hluthafa bankans, Exista.