Matthías: Ég er sturlaður

Matthías Guðmundsson kom inn á sem varamaður hjá Val í kvöld en liðið gerði þá jafntefli við KR í Frostaskjólinu, 1-1. Hann var ósáttur við að hafa ekki fengið víti þegar virtist brotið á honum í teig KR-inga.

Grétar Sigfinnur virtist brjóta á Matthíasi þegar hann var að komast í góða stöðu en Magnús Þórisson lét það vera að dæma.

„Ég er alveg sturlaður," sagði Matthías eftir leikinn. „Þetta var svo mikið víti að það var ekki fyndið. Ég var búinn að plata hann og kominn í upplagt færi."

„Þetta er svekkjandi. Ég hef verið frá í þrjár vikur og var búinn að láta mig dreyma um að koma inn á í þessum leik og skora," bætti hann við í léttum dúr.

„Vissulega lá aðeins á okkur í seinni hálfleik en það er eðlilegt á útivelli. Þeir fengu samt ekki mikið af færum - áttu vissulega skalla í stöng og skoruðu ódýrt mark. En það var karakter að jafna og við sýndum að Valsmenn gefast aldrei upp."

Valur hefur fengið á sig fæst mörk allra liða í deildinni. „Leikurinn í kvöld endurspeglaði það. Við spiluðum mjög góðan varnarleik og það er erfitt að komast í gegnum okkur."