Bjarni: Spiluðum ekki nógu vel

Bjarni Guðjónsson, fyrirliði KR, segir að sínir menn hafi alls ekki náð sínu besta fram gegn Valsmönnum í kvöld. Liðin skildu jöfn, 1-1.

„Þetta var mjög erfiður leikur,“ sagði Bjarni. „Þeir eru rosalega þéttir fyrir í vörninni og lokuðu á það sem við höfum verið að gera í sumar. En við eigum að geta svarað þessu betur. Við náðum ekki að opna þá eins mikið og við getum.“

KR komst yfir þremur mínútum fyrir leikslok en Valur náði að jafna á lokamínútunni. „Það var svekkjandi. Við áttum líka skalla í slá og vorum líklegri til að skora í leiknum. Þeir beittu skyndisóknum og sóttu þá hratt á okkur en annars var ekki mikið um uppspil hjá þeim.“

„Þetta var samt alls ekki nógu gott hjá okkur og við spiluðum ekki nógu vel. Það er þó engin þreyta í okkur enda höfum við æft vel, bæði í vetur og á milli leikja. Valur er einfaldlega með hörkugott lið.“