Árni Páll óhress yfir stöðu Íslands

Efnahags- og viðskiptaráðherra segir að það sé mikið áhyggjuefni að erlent tryggingafyrirtæki telji hvergi áhættusamara að fjárfesta meðal vestrænna ríkja en hér á landi. Hann segir að menn þurfi að komast yfir það gríðarlega tilfinningarót sem virðist heltaka marga í hvert skipti sem útlendingur lætur sér detta í hug að fjárfesta á Íslandi.

Áhættusamara er að fjárfesta á Íslandi en í nokkru öðru ríki í Vestur-Evrópu að mati tryggingafyrirtækisins Aon sem metur áhættu af fjárfestingu í erlendum ríkjum. Í nýju mati þess segir að áhætta fylgi fjárfestingum hér á landi vegna hættu á pólitískum afskiptum, verkföllum, óeirðum og jafnvel greiðsluþroti íslenska ríkisins. Lönd sem lenda í sama áhættuflokki og Ísland eru til dæmis Egyptaland, Rússland, Tyrkland, og Albanía.

„Þetta er áhyggjuefni fyrir okkur. Íslenskt samfélag þarf á erlendri fjárfestingu að halda, og sérstaklega núna," segir Árni Páll.

Hvað hyggst þú gera sem ráðherra efnahagsmála í þessari ríkisstjórn til þess að vinda ofan af þessari þróun þannig að fjárfestar sjái hag sínum borgið að fjárfesta hér? „Við þurfum að standa við það sem við höfum sagt í stefnuyfirlýsingu ríkisstjórnarinnar að við sækjumst eftir erlendri fjárfestingu og við þurfum að setja skýrari stefnu fram um það hverskonar erlendri fjárfestingu við sækjumst eftir. Við erum með í bígerð þingsályktunartillögu þar um. Svo þurfum við auðvitað líka sem þjóð að komast yfir það griðarlega tilfinningarót sem virðist heltaka okkur í hvert einasta skipti sem einhver útlendingur lætur sér detta í hug að fjárfesta á Íslandi. Það má ekki verða sú tilfinning ráðandi hjá erlendum fjáfestum að þeir séu að hætta á mannorðsmorð eða stórfelld vandræði ef þeir ákveða að hætta sínu fé á Íslandi," segir Árni Páll.

Telurðu að hringlandahátturinn í kringum Magma-málið og þessi fyrstu viðbrögð sem fjárfesting Huangs Nubos er að fá hér á landi muni spilla fyrir okkur? „Þessi mál sýna mikilvægi þess að við nálgumst þessi viðfangsefni af meiri yfirvegun."