Ólafur: Víkingar voru miklu betri

„Víkingar voru miklu betri en við í þessum leik, komu afslappaðir en grimmir á sama tíma og refsuðu okkur," sagði Ólafur Kristjánsson, þjálfari Breiðabliks eftir 6-2 tap gegn Víkingum í kvöld.

„Undirbúningurinn var sá sami og fyrir alla aðra leiki. Það sem gerist bak við tjöldin hjá öðrum liðum á ekki að hafa áhrif á okkur. Það sem skipti máli fór fram hér fyrir opnum tjöldum, við vorum mjög slakir í nítíu mínútur."

„Við ætluðum að ná marki strax í seinni hálfleik en við það gefum við gott færi á okkur, þegar við minnkum muninn skora þeir fljótlega aftur og þá erum við aftur farnir að elta tveggja marka forystu."

„Það væri barnalegt að hafa ekki áhyggjur af stöðu liðsins eftir leik sem þennan, þessi spilamennska er ekki að fara að gefa okkur marga punkta," sagði Ólafur.