Gylfi hættir eftir leik Fylkis í kvöld

Gylfi Einarsson mun í dag leika sinn síðasta leik með Fylki í Pepsi-deild karla en hann neyðist nú til að leggja skóna á hilluna vegna þrálátra meiðsla.

Þetta var tilkynnt á Fylkisvelli fyrir leik liðsins gegn Stjörnunni sem hefst núna klukkan 17.00. Hægt er að fylgjast með beinni lýsingu frá leiknum hér.

Gylfi kom heim úr atvinnumennsku fyrir tímabilið og byrjaði tímabilið vel með Fylkismönnum. Hann hefur hins vegar lítið sem ekkert æft á milli leikja vegna meiðslanna og hefur undanfarið misst af flestum leikjum Árbæinga.

Þetta er mikill missir fyrir Fylkismenn enda spilaði Gylfi afar vel í upphafi tímabilsins. Hann skrifaði undir þriggja ára samning við Fylki í haust en sem fyrr segir leikur hann kveðjuleik sinn í kvöld.