Þorvaldur: Sénsinn er okkar

Þorvaldur Örlygsson, þjálfari Fram, var vitanlega hæstánægður með sigur sinna manna á Keflavík í kvöld, 1-0. Fyrir vikið er liðið komið í bullandi séns á að bjarga sér frá falli eftir skelfilegt gengi framan af móti.

Kristinn Ingi Halldórsson skoraði eina mark Fram í leiknum snemma í síðari hálfleik. Keflvíkingar fengu tækifæri til að jafna í uppbótartíma en áttu þá skalla í stöng.

„Við höfum verið að klúðra nokkrum stigum í síðustu 5-6 leikjum okkar en engu að síður höfum við verið að spila vel,“ sagði Þorvaldur eftir leikinn. „Það var því gott að fá þessi stig í kvöld en það er ljóst að við þurfum heldur betur að láta hlutina ganga með okkur ef við ætlum að klára dæmið.“

Hann segir að leikáætlun sinna manna hafi gengið upp að mestu leyti. „Það hefði verið gott að fá annað mark til að létta aðeins á pressunni og láta þá koma aðeins framar á völlinn. Þeir voru mjög þéttir í sinni varnarvinnu og voru duglegir. Þetta var því erfitt fyrir okkur og mér fannst við á köflum óþolinmóðir og farnir að örvænta.“

„En svo kom markið og þá sá ég glampa í augum strákanna - þeir ætluðu að selja sig dýrt eftir þetta,“ bætti Þorvaldur við. „Mörk breyta ekki bara leikjum, heldur persónum líka. Mörkin hafa breytt okkur í sumar og við gerum okkur grein fyrir því að við erum nálægt okkar markmiðum en við eigum enn langt í land.“

Hann hrósaði einnig Samuel Hewson sem var öflugur á miðjunni í kvöld. „Hann er virkilega hæfileikaríkur fótboltamaður og menn eins og hann og Steven Lennon gera aðra leikmenn í kringum sig betri. Það hjálpar mikið til.“