Tryggvi: Metið skiptir engu máli núna

Tryggvi Guðmundsson jafnaði markamet Inga Björns Albertssonar í efstu deild í kvöld er hann skoraði seinna mark ÍBV í 3-2 tapinu gegn Stjörnunni. Tryggvi gat ekki fagnað metinu í kvöld enda hundfúll að hafa tapað.

"Metið skiptir engu máli fyrir mig núna," sagði Tryggvi en hann hleypti miklu lífi í sóknarleik ÍBV eftir að hann kom af bekknum og í raun ótrúlegt að hann hafi ekki spilað frá upphafi.

"Ég er bæði og fúll með að hafa verið á bekknum. Aaron Spear kom inn fyrir mig síðast og skoraði tvö mörk. Hann átti skilið að byrja. Ég fékk hálftíma og reyndi að nýta hann vel," sagði Tryggvi en hvað fannst honum um vítaspyrnudóminn umdeilda?

"Mér fannst Kristinn taka þessa ákvörðun áður en atvikið gerist. Þetta er bara árekstur og enginn ástæða til að dæma."