Tómas Joð: Við stigum á bensíngjöfina

Tómas Þorsteinsson átti virkilega góðan leik á miðjunni hjá Fylki í Grindavík í kvöld og þá ekki síst í seinni hálfleik þegar gestirnir úr Árbænum keyrðu yfir heimamenn.

„Þetta var mjög gott, skoruðum fjögur mörk og sýndum ágætis karakter en við þurfum að hætta að spila þessa 45 mínútna leiki og spila 90 mínútur, eins og þetta er,“ sagði Tómas Þorsteinsson besti leikmaður vallarins í Grindavík í kvöld.

Fylkir var meira með boltann í fyrri hálfleik en Grindavík skapaði sér hættulegustu færin og skoraði eina marki hálfleiksins. Við fórum vel yfir hálfleikinn. Við áttum varla almennilegt færi. Við komumst í ágætis stöður en það vantaði upp á einbeitinguna til að koma góðum skotum að marki. Við fórum yfir þetta og lögðum áherslu á að hreyfa sig og koma boltanum nálægt markinu og okkur tókst það ágætlega og fengum smá meðbyr með okkur. Við fáum víti og það kemur okkur á bragðið.“

„Ég vil ekki horfa á það sem svo að Grindavík hafi gefið eftir, ég vil horfa á þetta sem svo að við stigum á bensíngjöfina, en ætli þetta sé ekki blanda af þessu bæði,“ sagði Tómas að lokum.