Rúnar: Hvílum Bjarna ef á þarf að halda

Rúnar Kristinsson stýrði KR-liðinu enn einu sinni til sigurs á vellinum í sumar. Í kvöld lágu Íslandsmeistarar Breiðabliks sem virkuðu þó ákveðnir í upphafi leiks.

„Þeir ætluðu kannski að pressa hátt á okkur og sjá í hvernig standi við værum. En við skorum upp úr fyrstu hornspyrnunni sem við fáum í leiknum. Það var frábært fyrir okkur en maður hefur alltaf áhyggjur þegar maður skorar svona snemma að menn haldi að þetta verði auðvelt. Sem betur fer héldu mínir menn áfram. Við bættum við þremur í fyrri hálfleik, öll eftir hornspyrnur þannig að ég er virkilega ánægður að við séum að fá mörk úr föstum leikatriðum," sagði Rúnar.

Varamannabekkur KR-inga er gríðarlega sterkur um þessar mundir. Í stað þess að hópurinn veikist eftir því sem líður á sumar með meiðslum eða leikbönnum hefur leikmannahópur KR-inga líklega aldrei verið sterkari.

„Egill Jónsson er kominn inn eins og Gunnar Þór. Fyrir eru þessir strákar sem sátu í upphafi móts. Ég er með stóran og breiðan hóp. Gaman að geta gefið þeim sénsinn í dag. Staðan í leiknum bauð upp á það. Þá nýttum við tækifærið að gefa Gunnari Þór og Agli smá tíma til þess að spila. Komast aðeins inn í okkar leik. Ég er virkilega sáttur við að við klárum leikina það snemma að við getum boðið hinum strákunum upp á þetta," sagði Rúnar.

Bjarni Guðjónsson fyrirliði KR fór meiddur af velli um miðjan síðari hálfleik.

„Bjarni er slæmur í náranum. Hugsanlega smávægileg tognun, teygði á einhverjum vöðvum þar og við verðum að bíða og sjá. Ég á nóg af mönnum og við verðum bara að hvíla Bjarna ef á þarf að halda á fimmtudaginn (gegn Dinamo Tbilisi). Það kemur maður í manns stað," sagði Rúnar.