Gísli Páll: Stórkostleg spilamennska

"Þetta var stórkostleg spilamennska og fyllilega verðskuldaður sigur. Við yfirspiluðum þá frá upphafi til enda," sagði Gísli Páll Helgason, leikmaður Þórs eftir 6-1 sigur á Víkingi.

"Við spiluðum bara okkar leik og hann virkaði vel í dag. Við nýttum færin okkar en hefðum auðvitað viljað halda hreinu."

"Nýji miðjumaðurinn, Clarke Keltie, kom sterkur inn og spilaði vel. Vítið hans var gott líka. Það var gott að vinna svona stórt með Atla Sigurjónsson í banni og það vantaði Jóhann Helga líka. Ragnar Hauksson skoraði líka sem var flott og gott fyrir hann."

Þórsarar skildu Víkinga eftir í falldraugnum með sigrinum og hafa nú sjö stiga forskot á þá.

"Það er frábært og vonandi tapar Fram líka. Við stefnum bara á miðjupakkann núna," sagði Gísli.