KR-liðið fór í óvissuferð í dag

KR-ingar fögnuðu sigrinum á Fram í Pepsi-deildinni í gær með því að skella sér í árleg óvissuferð í dag. Það sást til alls hópsins við Búlluna á Geirsgötu og Vísir forvitnaðist um málið hjá þjálfaranum Rúnari Kristinssyni.

„Þetta var bara óvissuferð hjá strákunum. Þeir voru að klára sjóstangaveiði núna og við hittumst hjá Búllunni til þess að gera okkur klára í bátana eins og menn segja," sagði Rúnar léttur en honum fannst kominn tími á að gefa strákunum smá hvíld frá fótboltanum enda langt í næsta leik.

„Ég ákvað að gefa þeim smá frí. Strákarnir fara árlega í einhverja óvissuferð sem einhverjir leikmenn skipuleggja. Þetta er gott til aðeins að lífga upp á andann í hópnum," sagði Rúnar.

KR-ingar hafa tveggja stiga forskot á ÍBV á toppi Pepsi-deildar karla auk þess að eiga einn leik inni. Þeir hafa ekki enn tapað leik á tímabilinu og unnu bikarmeistaratitilinn á dögunum.