Hagnaður Century Aluminium fjórfaldast milli ára

Hagnaður Century Aluminium, móðurfélags Norðuráls, hefur meir en fjórfaldast milli ára. Á fyrri helmingi þessa árs nam hagnaðurinn 49 milljónum dollara eða um 5,6 milljörðum kr. Til samanburðar nam hagnaðurinn á fyrri helmingi síðasta árs tæpum 11,5 milljónum dollara.

Þetta kemur fram í uppgjöri félagsins fyrir fyrstu sex mánuði ársins. Hagnaðurinn á öðrum ársfjórðungi nam tæpum 24 milljónum dollara eins og vænst hafði verið. Á sama tímabili í fyrra nam hagnaðurinn rúmum 5 milljónum dollara. Það er hátt heimsmarkaðsverð á áli á síðustu mánuðum sem veldur þessari aukningu á hagnaðinum.

Fjallað er um framkvæmdirnar í Helguvík í uppgjörinu og þar segir að unnið sé af fullum krafti við að koma þeim aftur í gang með því að leysa deiluna við HS Orku um orkuverðið fyrir hið nýja álver.

Century Aluminium reiknar með að eyða 1 til 2 milljónum dollara á mánuði út árið í ár til þess að viðhalda framkvæmdum í Helguvík. Fram kemur í uppgjörinu að ef félagið neyddist til þess að hætta við álverið í Helguvík myndi slíkt kosta um 20 milljónir dollara, eða um 2,3 milljarða kr. aukalega vegna uppgjöra á verktakasamningum.