Sigmar Ingi Sigurðarson er leikmaður 19. umferðar Pepsi-deildar karla að mati Fréttablaðsins. Hann sýndi marga frábæra takta í marki Breiðabliks er liðið gerði 1-1 jafntefli við Keflavík suður með sjó í fyrrakvöld.
„Við ætluðum að stimpla okkur endanlega út úr botnbaráttunni með þessum leik," sagði Sigmar Ingi við Fréttablaðið í gær. „En þetta var opinn leikur þar sem sigurinn gat dottið með báðum liðum."
Breiðablik er núverandi Íslandsmeistari og því einkennilegt að liðið skuli vera að daðra við botnbaráttu fremur en titilslaginn. „Við vorum með skýr markmið fyrir tímabilið um að sækja titilinn upp á nýtt. Það hefur einfaldlega engan veginn gengið eftir," sagði Sigmar Ingi. „Við komumst í raun aldrei af stað eða á skrið með því að vinna nokkra leiki í röð."
Sumarið hefur þó verið ágætt fyrir Sigmar Inga sem hefur fengið mikið að spila og haldið Ingvari Þór Kale, sem á nokkra landsleiki að baki, úr liðinu í síðustu leikjum.
„Ég spilaði nokkra leiki í upphafi móts sem gekk ágætlega. Svo þegar ég fékk aftur tækifærið hef ég reynt að nýta það eins vel og ég get. Mér finnst góður stígandi í mínum leik."
Sigmar er 28 ára gamall uppalinn Bliki en hefur aldrei spilað meira með liðinu en nú í sumar. Hann á einnig nokkur ár að baki með ÍH og Hvöt í 2. og 3. deild en kom svo aftur til Breiðabliks fyrir sumarið 2009. Þar til í sumar voru tækifærin af skornum skammti.
„Ég hef alltaf verið með jákvætt viðhorf og sætt mig við mína stöðu. Ég hef ekki mikið getað sagt síðustu ár enda hefur Ingvar spilað mjög vel, þó svo að hann hafi ekki alveg fundið sig í sumar. Ég hef bara haldið áfram, lagt hart að mér og reynt að bæta mig."
Sigmar Ingi: Er með jákvætt viðhorf
