Grindvíkingar endurgreiða stuðningsmönnum og bjóða í grill

Grindvíkingar ætla að endurgreiða stuðningsmönnum liðsins sem lögðu leið sína í Kaplakrika í gærkvöld og sáu sína menn tapa 7-2 gegn FH. Þá bjóða leikmennirnir öllum stuðningsmönnum liðsins í grillveislu að lokinni æfingu liðsins annað kvöld.

Grindvíkingar voru langt niðri að loknu tapinu í gær. Óskar Pétursson markvörður þeirra segir að leikmönnum Grindvíkinga sé langt í frá að vera sama hvernig gengi liðsins hafi verið að undanförnu. Að leik loknum í gær ákváðu leikmennirnir að nota sektarsjóð sinn til þess að endurgreiða stuðningsmönnunum sem mættu í Hafnarfjörð í gær.

„Við komum heim til Grindavíkur og settumst niður eftir leik. Bölvuðum hver öðrum og losuðum um smá spennu. Svo fórum við að íhuga hvernig við gætum bætt okkar leik og allt í kringum okkur. Snúið þessu við. Þá kom þessi hugmynd sem allir tóku vel í. Okkur er langt í frá að vera sama um gengi liðsins og viljum gera góða hluti,“ sagði Óskar við Vísi.

Þá hafi komið upp sú hugmynd að blása til grillveislu eftir æfingu liðsins á morgun og eiga góða stund með stuðningsmönnunum.

„Ætli við byrjum ekki í kringum sjö hálfátta. Við ætluðum að hafa smá hópefli og það virkar ennþá betur ef stuðningsmennirnir eru með. Bjarni Ólafsson, Bibbi, í stjórn félagsins, mikill meistari og afbragðssósu, mun grilla borgaranna með sinni heimsfrægu „bósó“-sósu,“ sagði Óskar að lokum.