Óvissunni um Nubo létt en hann er enn spenntur fyrir Grímsstöðum

Huang Nubo er tilbúinn að skoða tillögu um nýtingu lands á Grímsstöðum á Fjöllum ef tillaga þess efnis berst frá íslenskum stjórnvöldum eða landeigendum á svæðinu. Steingrímur J. Sigfússon, fjármálaráðherra, átti spjall við Nubo í Kína fyrir nokkrum vikum.

Í finnskum fjölmiðlum er greint frá því að Nubo hafi snúið sér að Lapplandi í Finnlandi úr því íslensk stjórnvöld hafi ekki verið tilbúinn að verða við beiðni hans um umdanþágu vegna Grímsstaða á Fjöllum. En það er þó ekki öll nótt úti enn.

Fyrir helgi sagði forsætisráðherra æskilegt að ná lendingu varðandi fjárfestingu Nubo á Grímsstöðum á Fjöllum ef hann hefði enn áhuga á uppbyggingu þar. „Ef áhugi er fyrir þessari fjárfestingu og þessari uppbyggingu á þessum hótelrekstri og, og því tengt, eins og hann hefur nefnt, golfvöll og fleira, að þá held ég að það geti varla verið því mikið til fyrirstöðu að það yrði komið inn með þessa beiðni sem ákveðinn fjárfestingarkost af hálfu Kínverjanna og þá reynt að skoða það jákvætt," sagði forsætisráðherra.

Halldór Jóhannsson, ráðgjafi Nubos hér á landi, sagði í samtali við fréttastofu að Nubo hefði enn áhuga á Grímsstöðum á Fjöllum því hann væri búinn að kanna svæðið og þá möguleika sem það hefði upp á að bjóða, en hann liti svo á að nú væri boltinn hjá íslenskum stjórnvöldum og landeigendum, úr því beiðni hans um undanþágu hafi verið synjað. Tillaga um nýtingu landsins verði því að koma frá íslenskum stjórnvöldum eða landeigendum.

Hitti Steingrím í Kína

Nubo fundaði bæði með Össuri Skarphéðinssyni, utanríkisráðherra og Árna Páli Árnasyni, efnahags- og viðskiptaráðherra, meðan hann var hér á landi síðast, en það sem ekki hefur komið fram er að Nubo hitti Steingrím J. Sigfússon, fjármálaráðherra, meðan Steingrímur sótti viðskiptaráðstefnu í Sichuan héraði í Kína í október síðastliðnum. Um er að ræða Western China International Fair sem er næststærsta viðskipta- og kaupstefna sem haldin er þar í landi á vegum kínverskra stjórnvalda.

Upplýsingafulltrúi fjármálaráðherra segir hins vegar að um „óformlegt spjall hafi verið að ræða þar sem landakaupin á Grímsstöðum hafi ekki verið rædd sérstaklega." Það stangast á við orð Halldórs sem segir að um fund hafi verið að ræða og landakaupin á Grímsstöðum á Fjöllum hafi verið rædd.

Að sögn Halldórs var óskað eftir fundi með Ögmundi Jónassyni, innanríkisráðherra og var Nubo tilbúinn að koma til Íslands í þeim erindagjörðum en af þeim fundi varð aldrei. Halldór sagðist hafa bréflega óskað eftir fundi með Ögmundi 29. og 30. ágúst en þeim bréfum var aldrei svarað. Halldór sagðist ekki vita hvers vegna Ögmundur hafi aldrei orðið við ósk um fund.

Hinn 30. september barst bréf frá innanríkisráðuneytinu þar sem óskað var eftir frekari upplýsingum um félag Nubos. 15. nóvember var síðan að nýju óskað eftir frekari upplýsingum um félagið sem sendar voru nokkrum dögum síðar. Aldrei varð ráðuneytið eða ráðherra hins vegar við óskum Nubos um fund, að sögn Halldórs Jóhannssonar.

Verklag framkvæmdarvaldinu „ekki samboðið"

Mikill hiti er enn á á þinginu vegna ákvörðunar innanríkisráðherra og duldist það engum sem fylgdist með þingumræðum í dag. Sigmundur Ernir Rúnarsson, þingmaður Samfylkingarinnar, las upp úr bréfi Tryggva Harðarssonar í Fréttablaðinu en Tryggvi sakaði Ögmund um gerræðislega geðþóttaákvörðun í málinu. „Þetta ber að harma. Þetta er verklag sem á ekki að vera Alþingi og framkvæmdarvaldinu samboðið og ég heiti á ferðamálaráðherra að taka frumkvæði í þessu máli," sagði Sigmundur Ernir. thorbjorn@stod2.is