Umfjöllun: Hlynur Atli kom Fram úr fallsæti

Fram vann í dag nauman 2-1 sigur á Grindavík í hörðum fallbaráttuslag suður með sjó. Grindvíkingar eru fyrir vikið dottnir niður í ellefta sæti deildarinnar fyrir lokaumferðina um næstu helgi.

Orri Gunnarsson kom Fram yfir um miðjan fyrri hálfleikinn og opnaði það leikinn upp á gátt. Grindvíkingar lögðu meira í sóknarleikinn og uppskáru mark á 66. mínútu er Magnús Björgvinsson skoraði með flottu skoti.

Tólf mínútum síðar skoraði þó Fram öðru sinni. Hlynur Atli Magnússon var þar að verki með skalla eftir hornspyrnu. Reyndist það sigurmark leiksins og eru Framarar því komnir með 21 stig. Grindavík er hins vegar enn með 20 stig og er nú í fallsæti.

Leikurinn var jafn og skemmtilegur og fengu bæði lið fær til að klára leikinn. Framarar nýttu sín hins vegar betur og skildi það á milli í dag.

Hann fór þó rólega af stað enda mátti hvorugt lið við því að tapa leiknum. Það var því ef til eðlilegt að mark þurfti til að koma þessum leik almennilega í gang.

Það mark kom á 25. mínútu. Orri Gunnarsson var þar að verki með hnitmiðuðu skoti eftir slaka hreinsun úr vörn Grindavíkur. Steven Lennon hafði átt ágæta rispu inn í teig heimamanna sem lagði grunninn að markinu.

Grindvíkingar settu meiri kraft í sóknarleikinn eftir þetta enda ekkert annað sem dugði til. Jóhann Helgason og Alexander Magnússon áttu báðir ágætar marktilraunir skömmu síðar og í lok hálfleiksins átti Magnús skalla að marki sem var varið í horn.

Það voru þó Framarar sem komust næst því að skora eftir fyrsta markið. Sam Tillen tók aukaspyrnu frá hægri kantinum, beint á kollinn á Sam Hewson sem lúrði á fjærstönginni. Boltinn virtist á leiðinni inn þegar að markvörður og fyriliði Grindavíkur, Óskar Pétursson, varði glæsilega frá honum og hélt sínum mönnum þar með inni í leiknum.

Ögmundur Kristinsson, markvörður Fram, mátti ekki vera minni maður og varði stórglæsilega frá Óla Baldri Bjarnasyni á 56. mínútu. Stuttu síðar fékk hann þungt höfuðhögg en hélt að lokum áfram, þó svo að hann hafi greinilega verið vankaður.

Grindavík lék undan vindi í seinni hálfleik og settu mikinn þunga í sóknarleikinn. Þeir létu skotin dynja á Ögmundi og hafnaði boltinn í netinu eftir eitt slíkt. Magnús var þar að verki með frábæri skoti sem Ögmundur átti ekki möguleika í að verja.

Framarar vöknuðu við þetta og leikurinn snerist þeim í hag þegar um 20 mínútur voru eftir. Grindavík sótti áfram stíft og skildi eftir mikið pláss fyrir sóknarmenn Fram sem heimamenn áttu í stökustu vandræðum með.

Gestirnir fengu í kjölfarið fjölda færa til að skora en létu Óskar ávallt verja frá sér. Hann kom þó engum vörnum við þegar að Hlynur Atli skallaði hornspyrnu Sam Tillen í netið.

Framarar gáfu fá færi á sér eftir þetta, biðu þolinmóðir eftir að leikurinn væri flautaður af og fögnuðu eðlilega vel og innilega í leikslok. Grindvíkingar geta þó sjálfum sér um kennt með værukærum varnarleik eftir að jöfnunarmarkið kom. Þeir eru nú í fallsæti og eiga erfiðan útileik í Vestmannaeyjum fyrir höndum í lokaumferðinni. Fram hoppaði upp í níunda sæti deildarinnar með sigrinum.

Grindavík – Fram 1-2

Dómari: Kristinn Jakobsson (6)

Skot (á mark): 16–10 (10-6)

Varin skot: Óskar 4 – Ögmundur 9

Hornspyrnur: 6–9

Aukaspyrnur fengnar: 12–11

Rangstöður: 4–1