Sigurður Bjarnason: Aron er í heimsklassa

Ég var bjartsýnn fyrir heimsmeistaramótið og eftir að hafa séð báða leikina gegn Þjóðverjum í Laugardalshöllinni um s.l. helgi þá var ég sannfærður um að við munum ná góðum úrslitum í fyrsta leiknum á HM," segir Sigurður Bjarnason sem var einn af lykilmönnum íslenska landsliðsins í handbolta og er einn af þremur handbolta sérfræðingum visir.is.

Við erum einfaldlega betri en Ungverjar og 32-26 sigur lofar góðu. Það var ótrúlegt að sjá baráttuna hjá íslenska liðinu. Ég hafði ekki stórar áhyggjur af þessum leik þar sem að Guðmundur Guðmundsson landsliðsþjálfari er frábær í að undirbúa liðið. Þeir voru með allt á hreinu og vörnin er frábær. Björgvin Gústavsson markvörður svaraði líka gagnrýni með því að verja vel í mikilvægum leik. Hann lætur verkin tala.

Það er mín tilfinning að landsliðshópurinn ætli sér stóra hluti en þeir ætla ekki að segja frá því. „Strákarnir okkar" eru með ótrúlegt sjálfstraust eftir silfur á ÓL 2008 og brons á EM 2010. Þeir vita að þeir geta náð árangri. Og Guðmundur er með frábært þjálfarateymi með sér. Þeir nýta sér nútímatækni og kortleggja andstæðinga frá A-Ö. Það er ekkert sem kemur Íslendingum á óvart.- ekkert.

Ólafur Stefánsson hagar sér eins og hann sé tvítugur, hann er ótrúlegur. Ég veit ekki hvort þetta sé síðasta heimsmeistaramóti hjá Óla. Þþað er ekki hægt að segja neitt um það. Ólafur er einfaldlega með markmiðin á hreinu. Ólympíuleikarnir í London 2012 eru fyrir handan hornið og ég er ekki í vafa um að hann og liðið stefnir á að komast á ÓL.

Aron Pálmarsson var frábær í leiknum. Hann skoraði átta mörk. Aron er að spila með einu af besta félagsliði heims og hann er með sjálfstraust sem er ekki hægt að lýsa. Aron er 21 árs en hann spilar eins og þaulreyndur landsliðsmaður. Það var frábært fyrir Ísland að Aron samdi við Kiel. Alfreð Gíslason þjálfari Kiel er með okkar efnilegasta leikmann alla daga á æfingum. Og niðurstaðan getur bara verið jákvæð. Aron er ekki að leika eins og nýliði. Hann lætur verkin tala og er í heimsklassa," segir Sigurður Bjarnason.