Helgi Már stigahæstur í sigurleik

Helgi Már Magnússon skoraði 24 stig þegar að lið hans, 08 Stockholm, vann góðan sigur á Norrköping í sænsku úrvalsdeildinni í körfubolta, 79-74.

Helgi Már fór mikinn í leiknum og tók einnig sjö fráköst og gaf fjórar stoðsendingar. Hann spilaði í samtals 35 mínútur og nýtti fjögur af sex þriggja stiga skotum sínum.

08 Stockholm komst með sigrinum upp í fimmta sæti deildarinnar en liðið er með átján stig. Norrköping er í öðru sæti með 20 stig og missti af tækifæri til að skella sér á topp deildarinnar.

Helgi fór á vítalínuna þegar tvær sekúndur voru eftir af leiknu og tryggði sínum mönnum endanlega sigurinn með því að setja bæði vítaskotin niður.