Norðmaður selur smjör til hjálpar bágstöddum

Ungur Normaður hefur ákveðið að fara ótroðnar slóðir til að hjálpa bágstöddum fyrir jólin en hann nýtir til þess smjörskortinn í landinu.

Í því ástandi sem nú ríkir í Noregi telst það til frétta að Norðmaður finni eða eigi smjör. Þrátt fyrir að lúra á dýrmætu smjöri hefur húsbóndinn á þessu heimili ekki áhuga á að nýta sér mjólkurafurðina í jólabaksturinn. Hann hefur nefnilega sett þetta 500 gramma smjörstykki á netuppboð og ætlar að selja það til hæstbjóðanda.

„Ég held að það sé lága kolvetnistískan sem hefur komið okkur í þessa stöðu. Ef menn eru svona aðframkomnir af smjörleysi verða þeir að borga fyrir það."

Christian hefur ekki enn ákveðið hvenær uppboðinu lýkur.

„Fólk hefur áhuga á að sjá smjörið. Það er dýrt núna og menn verða að borga fyrir að fá að smakka."

Nú hugsa eflaust margir: Er þetta brask í anda jólanna? Jú, þó að Christian sé á mjög gráu svæði þá er hjartað eflaust á réttum stað. Með því að nýta sér neyð þeirra sem bráðvantar smjör er hann að hjálpa bágstöddum því söluandvirðið rennur óskert til hjálparstarfs kirkjunnar.