Tryggvi nálgast met Inga Björns, 120 mörk

Eyjamaðurinn, Tryggvi Guðmundsson, nálgast markametið í efstu deild karla óðum, en Tryggvi hefur nú skorað 120 mörk í efstu deild. Ingi Björn Albertsson skoraði 126 mörk í efstu deild og því vantar Tryggva aðeins sjö mörk til að bæta metið.

Tryggvi hefur gert fjögur mörk fyrir ÍBV á þessari leiktíð í Pepsi-deild karla en hann gerði eitt marka Eyjamanna í dag þegar liðið vann sterkan sigur, 3-1, á FH-ingum í Vestmannaeyjum.

Tryggvi gerði níu mörk á síðustu leiktíð fyrir Eyjamenn, en hann er samningsbundinn ÍBV út næsta tímabil og hefur því nægan tíma til að slá metið.

ÍBV á eftir að leika 13 leiki í Pepsi-deild karla í sumar og ef Tryggvi helst heill á hann góðan möguleika á því að slá met Inga Björns á þessu tímabili.