Hafnaði rökum Seðlabankans

Áfrýjunarnefnd samkeppnismála staðfesti í gær ákvörðun Samkeppniseftirlitsins um að beita Seðlabankann dagsektum vegna vanrækslu á afhendingu gagna og upplýsinga um útlán banka.

Forsaga málsins er sú að Samkeppniseftirlitið óskaði eftir gögnum frá Seðlabankanum í tengslum við rannsókn á samkeppnisaðstæðum á bankamarkaði. Seðlabankinn hafnaði hins vegar beiðninni með vísan til trúnaðar- og þagnarskyldu sem hvíldi á bankanum og benti á að eðlilegra væri að leitað væri beint til umræddra banka. Seðlabankinn fær í kjölfar úrskurðarins í gær frest til 1. júlí til að veita Samkeppniseftirlitinu þau gögn sem um var beðið en ella sæta dagsektum.

Í tilkynningu sem barst eftir að úrskurðurinn lá fyrir er hann sagður vera til skoðunar hjá Seðlabankanum. Þá er það sagt mat Seðlabankans að úrskurðurinn muni að óbreyttum lögum hafa áhrif á þá starfsemi bankans sem snýr að hagskýrslugerð. „Rík trúnaðar- og þagnarskylda hvílir á ríkisstofnunum sem sinna opinberri hagskýrslugerð og skulu upplýsingar sem aflað er til hagskýrslugerðar eingöngu notaðar í slíkum tilgangi," segir enn fremur í tilkynningunni en þar er ekki útilokað að málinu verði vísað til dómstóla. - mþl