Tryggvi: Þetta var „soft“ víti

Tryggvi Guðmundsson átti skrautlegan leik í kvöld. Hann skoraði mark úr víti sem hann viðurkennir að hafi ekki verið víti, skoraði mark með hnénu og fékk svo fjölda tækifæra til að innsigla þrennuna og jafna frægt markamet Inga Björns Albertssonar.

Tryggvi og félagar hans í ÍBV unnu 3-1 sigur á Víkingi í Pepsi-deild karla í kvöld og var hann vitanlega sáttur við úrslitin.

„Þetta var mjög sannfærandi sigur þó svo að þetta hafi ekki verið góður bolti í fyrri hálfleik. Við stjórnuðum þessu þó í seinni hálfleik enda galopnaðist leikurinn fyrir okkur eftir þær breytingar sem þeir gerðu,“ sagði Tryggvi en viðtalið má sjá í heild sinni hér fyrir ofan.

ÍBV fékk vítaspyrnu strax á sjöundu mínútu leiksins þegar að Mark Rutgers var dæmdur brotlegur í viðskiptum sínum við Tryggva.  

„Þetta var soft. Ég held að ég hafi frekar sparkað í Mark frekar en hann í mig. Ég stóð upp og hélt að dómarinn ætlaði annað hvort að dæma hornspyrnu eða útspark og svo bendir hann á punktinn.“

„En ég var alls ekki að fiska og alls ekki að biðja um víti. Þetta var mjög skrýtið, allt saman.“

Tryggvi lenti í svipuðum aðstæðum í leik ÍBV og KR á fimmtudaginn. „Nema að þá var það víti,“ sagði hann í léttum dúr. „Þetta var þó ekki víti og kannski er verið að jafna þetta út.“

Tryggvi lýsir því einnig í viðtalinu hvernig hann skoraði síðara markið sitt með hnénu en það var hans 125. mark á Íslandsmótinu frá upphafi. Hann vantar nú aðeins eitt mark upp á að jafna met Inga Björns Albertssonar en er þó orðinn þreyttur á umræðunni um metið.

„Ég var ekki að hugsa um þetta met og er ekki hræddur við að það verði einhver pressa á mér að skora næsta mark. Ég elska pressu.“

„En það er búið að ræða um þetta met síðan ég fór í 100 mörk og eina ástæðan fyrir því að mig langar til að bæta þetta met er svo að þið getið hætt að tala um það.“