Þórarinn Ingi: Barátta við KR fram í síðasta leik

Þórarinn Ingi Valdimarsson, leikmaður ÍBV, segir að sigurinn gegn Víkingi í kvöld hafi verið gott veganesti inn í landsleikjafríið sem er fram undan í Pepsi-deild karla.

„Þetta var léttir. Það er erfitt að koma hingað og spila við lið sem er í fallbaráttu. Við máttum hafa fyrir því að fá þrjú stig í kvöld,“ sagði Þórarinn Ingi en viðtalið má sjá í heild sinni hér fyrir ofan.

„Mér fannst við róast aðeins eftir að við komum þessum tveimur mörkum inn í fyrri hálfleik. Fram að því áttum við erfitt með að ná upp okkar spili en það gekk svo betur í seinni hálfleik.“

„Við hefðum getað sett inn fleiri mörk í seinni hálfleik en stundum er það bara þannig.“

Hann segir það gott að hafa ekki gefið neitt eftir í toppbaráttunni við KR, sem vann sinn leik gegn Fram í kvöld.

„Það er gott að vera búinn með þennan leik og geta farið inn í fríið með þrjú stig. KR-ingar gefa heldur ekkert eftir og þetta verður barátta fram á síðustu stundu.“