Vill lögreglurannsókn á vondum bókarskrifum

Bókin Saga Akraness, 1. bindi, fær vægast sagt skelfilega útreið í bókargagnrýni Páls Baldvins Baldvinssonar í Fréttatímanum í dag. Bókin hefur hingað til verið þekktust fyrir það að vera dýr í útgáfu en hún kostaði yfir 100 milljónir króna.

„Bókin er merkilegt sönnunargagn um lágt siðferðisstig íslenskrar bókaútgáfu og ætti að verða fyrsta verk sýslumannsins á svæðinu að gera eintök bæjarstjórnarinnar á Akranesi upptæk í svo stóru þjófnaðarmáli. Er ekki lögregla á Akranesi?," spyr Páll Baldvin í gagnrýni sinni.

Þá segir Páll Baldvin að höfundur og útgefandi þverbrjóti reglur um myndrétt, elti uppi myndir og afriti í mislitlum gæðum af vef og úr bókum. Höfundar bókarinnar segi þó sjálfir: „Bók þessa má ekki afrita með neinum hætti ..." en steli sjálfir ótæpilega sem skili sér í illa unnu myndefni, muskulegum eftirtökum, svo grófkvörðuðum að mynd eftir mynd sé ónýt í prentun.

Einnig sakar Páll Baldvin höfund bókarinnar um slælega heimildavinnu.