Arion segir verðbólguna yfir markmiðum næstu tvö árin

Greiningadeild Arion banka gerir ráð fyrir því að verðbólga verði yfir verðbólgumarkmiði Seðlabankans næstu tvö árin. Samkvæmt spánni verður verðbólga í 5,4% í lok þessa árs, 3,4% í lok næsta árs og 4% í lok árs 2013.

Greiningadeildin segir að þessi viðvarandi verðbólga eigi rætur sínar að rekja til nokkurra þátta. Þyngst vegi hækkun á markaðsverði húsnæðis. Samkvæmt spá greiningardeildar er útlit fyrir að skortur á íbúðamarkaði árið 2013 muni leiða af sér enn frekari hækkanir á húsnæðisverði en á árinu 2012. Samhliða verðhækkunum á íbúðamarkaði og auknum umsvifum í hagkerfinu árið 2013 megi því búast við því að verðbólgan fari lítillega upp á ný.

Að öðru leyti liggja eftirtaldar forsendur að baki:

Undirliggjandi slaki í hagkerfinu enn til staðar. Að okkar mati er sú aukna eftirspurn sem mældist síðla sumar tímabundin. Launahækkanir í sumar og útgreiðsla vegna endurútreikninga gengistryggðra lána hefur eflaust haft tímabundin áhrif á neyslumynstur heimila. Tillaga í frumvarpi fjárlaga um minnkun framlags í séreignasparnað úr 4% í 2% gæti þó haft neikvæð áhrif á hvata einstaklinga til að spara og leitt til aukinnar neyslu heimila í vetur ef tillagan verður samþykkt í óbreyttri mynd. 

Launhækkanir sumarsins leiddu til kostnaðarverðbólgu. Áframhaldandi launahækkanir í samræmi við kjarasamninga munu hafa áhrif til hækkunar. Inn í launaliðinn á eftir að bætast við 3,5% hækkun 2012 og 3,25% árið 2013 sem við gerum ráð fyrir að verði ýtt út í verðlag nokkuð örugglega.

Krónan stöðug - höftin ekki að fara. Flest bendir til þess að höftin verði hér um allnokkra hríð a.m.k. fram til ársins 2015, líkt og heimild er nú til. Miðað við horfur um undirliggjandi viðskiptajöfnuð er fátt sem bendir til þess að miklar breytingar verði á gengi krónunnar á spátímabilinu sem hér er til skoðunnar.

Skatta- og gjaldskrárhækkanir: Halda í við verðlagshækkanir. T.a.m. mun ríkið hækka álögur áfram á bensín, áfengi og tóbak, OR hækka verðskrá sína, og sveitarfélög hækka leikskólagjöld, sorphirðugjöld o.s.frv. svo að verðskrá haldi verðgildi sínu.

Húsnæðisliður til hækkunar: Umsvif á fasteignamarkaði hafa aukist verulega á það sem af er ári. Að mati greiningardeildar verðurhúsnæðisliðurinn einn helsti drifkraftur verðbólgunnar á næstu misserum, en greiningardeild spáir 18% uppsafnaðri nafnverðshækkun á húsnæði til loka ársins 2013.