Voru viðstödd fæðinguna - bíða viðbragðra indverskra stjórnvalda

Foreldrar Jóels Færseths Einarssonar, sem fæddist af indverskri staðgöngumóður fyrir skömmu, segjast lítil samskipti hafa haft við staðgöngumóðurina, en hafi þó verið viðstödd fæðinguna. Þau eru föst á Indlandi, en beðið er viðbragða indverskra stjórnvalda um forræði yfir drengnum og ríkisfang.

Jóel Færseth Einarsson, sem við sjáum hér, er orðinn rúmlega tveggja mánaða. Indversk staðgöngumóðir gekk með hann og fæddi, með keisaraskurði, á sjúkrahúsi í Mumbai, þrettánda desember. Helga Sveinsdóttir og Einar Færseth, voru viðstödd fæðinguna.

„Við klipptum á naflastrenginn og fengum drenginn strax í hendurnar," segir Helga í samtali við fréttastofu.

Samt sem áður hafi þau lítil samskipti átt við staðgöngumóðurina. Þau hafi hitt hana fyrir meðgöngu - en meðan á henni stóð, hafi öll samskipti farið fram í gegnum lækni.

Enda þótt Jóel sé íslenskur ríkisborgari, er hann vegabréfslaus. Einar og Helga eru því föst þar ytra og vita ekki hvenær þau komast heim.

Málið stendur þannig nú að beðið er svara frá indverskum stjórnvöldum um hvort þau mótmæli því að Helga og Einar fari með forstjá drengsins, og hvort þau telji hann jafnframt vera indverskan ríkisborgara. Jóel var getinn með eggi frá þriðju konunni og sæði úr Einari. Þau segjast tilbúin til að færa sönnur á faðernið með DNA prófi, þurfi þess við.

Staðgöngumæðrun er ólögleg hér á landi, og engin lög eru í gildi um þetta á Indlandi.

Nokkrir þingmenn, þar á meðal tveir fyrrverandi heilbrigðisráðherrar, hafa lagt fram tillögu til þingsályktunar um að staðgöngumæðrun verði heimiluð hér. Við fjöllum ítarlega um þessi mál í fréttum okkar á morgun og á Vísi.