„Öldungurinn“ Ege er mikilvægasti leikmaður Noregs

Ólafur Stefánsson verður ekki aldursforsetinn í B-riðlinum á HM í Svíþjóð því norski landsliðsmarkvörðurinn Steinar Ege er 38 ára og hefur sjaldan verið betri. Íslendingar mæta Norðmönnum í lokaleiknum í riðlakeppninni og má búast við því að sá leikur verði einn af úrslitaleikjum Íslands í keppninni.

Ege er samherji Snorra Steins Guðjónssonar og Arnórs Atlasonar hjá AG í Danmörku en Norðmaðurinn segir í viðtali við NTB að viðamikil hnéaðgerð fyrir ellefu árum hafi breytt öllu fyrir hann sem íþróttamann. „Ég hef aldrei verið í betra ástandi og æfingarnar hjá mér voru mjög fjölbreyttar s.l. haust. Það hefur skilað sér og ég hef alltaf verið óhræddur við að prófa nýja hluti," segir Ege en hann hefur aldrei náð að vinna til verðlauna með norska landsliðinu en hann vonast eftir góðum árangri á HM í Svíþjóð.

Noregur tapaði þremur af alls fimm leikjum sínum í lokaundirbúningnum fyrir HM. „Við höfum náð að slípa okkur betur saman og framfararnir hafa verið góðar. Leikmannahópurinn er ekki mjög breiður og við vonum að Frank Løke og Kjetil Strand nái sér af meiðslunum og verði með á HM. Bjarte Myrhol og Børge Lund hafa einnig verið meiddir og við megum einfaldlega ekki við slíku," segir Ege sem bætir líklega landsleikjametið á HM. Thomas Lauritzen á metið sem er 254 leikir en Ege þarf að bæta við sjö leikjum og ef Noregur kemst í milliriðil jafnar hann metið í það minnsta

Ege segir að leikjametið sé ekki í forgangi og hann gæti hvílt gegn liðum á borð við Brasilíu eða Japan. „Það skiptir mestu máli að vera vel á sig kominn hvíla ef þess er þörf. Ég hef sagt það áður að það væri löngu búið að aflífa mig ef ég væri hestur," sagði Ege og vitnar þar í langa meiðslasögu sína.

Liðsfélagi hans Bjarte Myrhol sem leikur undir stjórn Guðmundar Guðmundssonar hjá Rhein Neckar Löwen segir að Ege sé langmikilvægasti leikmaður norska landsliðsins.

„Hann er frábær fyrirmynd fyrir okkur yngri leikmennina. Hann hefur aldrei verið í betra ástandi og ef okkur tekst að ná því allra besta hjá 2-3 leikmönnum í þessari keppni þá eigum við möguleika á að leika um verðlaun," sagði línumaðurinn sterki Bjarte Myrhol.