Gunnar Már: Ætlum að gera heimavöllinn að vígi

Gunnar Már Guðmundsson nýjasti liðsmaður Þórsara var að vonum svekktur með tap sinna manna en vildi þó ekki meina að leikur þeirra væri alsæmur.

„Við vorum betri fyrstu 20-25 mínuturnar en svo ná þeir að skora þetta mark þarna eftir klafs í teignum. Helgi Sig er auðvitað klókur og kann þetta allt saman. Fram að þessu marki þeirra fannst mér þeir ekki vera að skapa neitt. Við byrjuðum leikinn á miklu og háu tempói og náðum auðvitað ekki að halda því út allan fyrri hálfleikinn. Svo breyttum við um skipulag í hálfleik og seinni hálfleikur var jafn en þeir náðu að setja eitt í restina og því fór sem fór."

Aðspurður sagðist Gunnar lítast vel á framhaldið hjá Þórsliðinu. „Ég flyt fljótlega norður og er búinn að taka nokkrar æfingar. Mér líst bara vel á þetta Þórslið og strákarnir virka flottir. Það er bara svo mikið af viðurnefnum á þessum strákum þannig að það tekur smá tíma að tengja öll þessi nöfn saman.

„Ég er auðvitað að reyna að ná upp leikforminu. Þessi leikur í kvöld var aðeins annar 90 mínútna leikurinn sem ég spila á tólf mánaða tímabili. Framhaldið verður skemmtilegt. Við byrjum á erfiðu útileikjaprógrammi og við gerum okkar besta í því að kroppa stig hér og þar og svo förum við norður og stefnum á gera heimavöllinn að erfiðu vígi"