Ingvar Helgason og B&L selt Ernu Gísladóttur

Miðengi ehf. (dótturfélag Íslandsbanka), SP Fjármögnun hf. og Lýsing hf. hafa gengið frá sölu á eignarhaldsfélaginu BLIH ehf. (BLIH) til félags í eigu Ernu Gísladóttur samkvæmt tilkynningu frá Miðengi.

Fyrirtækjaráðgjöf Íslandsbanka hafði umsjón með söluferlinu fyrir hönd seljenda en Deloitte Fjármálaráðgjöf aðstoðaði Ernu.

Opið söluferli á BLIH, móðurfélagi Ingvars Helgasonar ehf. (IH) og Bifreiða og landbúnaðarvéla ehf. (B&L), hófst þann 31. ágúst sl. Söluferlið var opið öllum áhugasömum fjárfestum sem uppfylltu skilyrði þess að geta talist fagfjárfestar samkvæmt, eða búa yfir fullnægjandi þekkingu og reynslu ásamt því að geta sýnt fram á ákveðna eiginfjárstöðu.

Eftir viðræður við fimm fjárfesta var ákveðið að hefja formlegar viðræður við Ernu Gísladóttur samkvæmt tilkynningu.

Þeim viðræðum er nú lokið með undirskrift kaupsamnings. Samningar eru gerðir með fyrirvara um endanlegt samþykki Samkeppniseftirlitsins og erlendra bifreiðaframleiðanda sem BLIH er með umboð fyrir.

Kröfuhafar stofnuðu Eignarhaldsfélagið BLIH ehf. í febrúar 2011 til að halda utan um eignarhlut sinn í bifreiðaumboðunum Ingvari Helgasyni ehf. og Bifreiðum og landbúnaðarvélum ehf. Félögin tvö eru vel þekkt á Íslandi og saman eru þau umboðsaðilar fyrir níu bifreiðaframleiðendur - Nissan, Subaru, Hyundai, BMW, LandRover, Renault, Opel, Isuzu og Irisbus.

Fréttastofa Stöðvar 2 greindi frá því fyrir skömmu að Erna Gísladóttir ætti að þekkja ágætlega til hjá BMW og Land Rover, sem framleiða m.a Range Rover biðfreiðarnar, þar sem hún gegndi starfi forstjóra B&L til ársins 2008 en hafði þar á undan starfað hjá fyrirtækinu frá árinu 1987.

Hún er í raun þriðja kynslóð stjórnanda hjá B&L því afi hennar stofnaði fyrirtækið árið 1954.