Lýsi annar ekki eftirspurn

Svo mikil eftirspurn er eftir íslensku lýsi að lýsisverksmiðjan skortir þorskalifur til að geta framleitt vöruna. Eftirspurnin er bæði hér innanlands og erlendis, segir Katrín Pétursdóttir, forstjóri Lýsis.

„Við höfum brugðið á það ráð að auglýsa meira hráefni til að auka framleiðsluna," segir Katrín í samtali við Reykjavík síðdegis í dag. Hún segir að íslenskir sjómenn séu duglegir við að hirða lifrina af fiskinum og um 85% af lifrinni skili sér í land.

Því sé ljóst að þörf sé á því að fá lifur frá mörkuðum erlendis og er Lýsi nú þegar komið í samstarf við fyrirtæki í Noregi. Katrín segir að þaðan sé keypt hrálýsi sem er svo unnið frekar á Íslandi.