Björgólfur: Markaðurinn að stækka

Aukin samkeppni í flugi er ekkert óeðlileg og Icelandair verður bara að gera enn betur, segir Björgólfur Jóhannsson, forstjóri Icelandair Group, í samtali við Vísi. „Menn eru að horfa til stærri markaðar og ætla að fá sér köku af því," segir Björgólfur. Hann segir að markaðurinn fari sífellt stækkandi og því sé spáð að fjölgun flugfarþega í ár verði allt að 20%.

easyJet segist ætla að bjóða flugferð á allt niður í sexþúsund krónur með flugvallarsköttum. „Ég á nú eftir að sjá hvaða verð þeir eru að tala um. Ég er ekki viss um að þeir muni selja öll sæti í vélinni á þessu verði sem þeir eru að tala um," segir Björgólfur. Hann útilokar þó ekki að Icelandair muni lækka verð hjá sér en menn þurfi einnig að velta fyrir sér þjónustu og öðrum þáttum sem tengjast flugi.

Þá bendir Björgólfur á að þau flugfélög sem eru í samkeppni við Icelandair séu sennilegast fyrst og fremst að horfa á sumartímann en það sé markmið Icelandair að auka þjónustu yfir vetrarmánuðina. Icelandair Group sé með víðtækan rekstur og aukin umferð til landsins komi hótelrekstri, ferðaþjónusturekstri hjá Iceland Travel og Flugfélagi Íslands til góða. Samkeppnin snerti því einkum Icelandair.