Arnar: Héldum haus

Arnari Gunnlaugssyni var létt eftir sigurinn á Víkingi í dag þar sem hann skoraði sigurmarkið úr vítaspyrnu í seinni hálfleik eftir að hafa klikkað úr víti áður í leiknum.

„Það var hrikaleg taugaspenna í leiknum. Grindavík var komið yfir og þetta hefði getað enda í tómri þvælu. Við náðum að innbyrða sigur og við sýndum þvílíkan karakter seinni hlutann í mótinu. Það er mjög erfitt að vera á botninum. Ég hef upplifað bæði að elta titilinn og vera á botninum. Það er meiri spenni á botninum. Það má lítið útaf bregða og mikið í húfi en ég held að þetta hafi verið frábært. Þetta var frábært fyrir þjálfarann sem hélt haus allan tímann,“ sagði Arnar í leikslok.

„Þetta var flott lið og svo bættust við tveir erlendir leikmenn sem gerðu gæfumuninn. Ekki nóg með það þá unnum við alla þessa leiki í lokin sannfærandi. Þetta var ekki eins og lið sem var að falla. Þetta var lið sem var að spila virkilega sannfærandi.“

„Við klúðrum færi á eftir færi nánast allan leikinn þó Víkingur hafi verið meira með boltann. Ég veit ekki hvað við fengum mikið af færum. Klúðrum víti þar sem við hefðum getað komið okkur í þægilega stöðu, 2-0, þá hefði þetta endað örugglega fimm, sex núll en Víkingar spiluðu mjög vel líka. Þeir spiluðu skemmtilegan fótbolta og gáfu okkur góðan leik,“ sagði Arnar en mark Víkinga kom upp úr engu.

„Það var nánast ekkert í gangi, við vorum að bíða eftir öðru markinu eiginlega en svo kom markið frá þeim og það veldur taugatitringi en við héldu haus í seinni hálfleik,“ sagði Arnar sem tekur ákvörðun síðar um framtíð sína í fótboltanum.

„Ég er á leið í fínt frí, ég tek ákvörðun eftir einn mánuð eða svo.“