Baldur: Eins og bikarúrslitaleikur

Baldur Sigurðsson skoraði tvö mörk í 3-2 sigri KR á Keflavíkur og átti heilt yfir mjög góðan leik. Hann hrósaði þó varamanninum Aroni Bjarka Jósepssyni sem skoraði sigurmark KR í uppbótartíma leiksins.

„Þetta voru tvö mörk sem hefðu bara dugað fyrir einu stigi ef Aron hefði ekki komið inn og skorað sigurmarkið. Ég vil því hrósa honum fyrir þetta frábæra mark,“ sagði Baldur en viðtalið má sjá í heild sinni hér fyrir ofan.

„Þetta var virkilega dramatískt en það er alltaf gaman að koma hingað til Keflavíkur og vinna hér. Við tökum þessu,“ bætti hann við.

„Við byrjuðum alveg hrikalega og þeir komust í frábæra sókn sem þeir skoruðu úr. Svo tökum við öll völd í svona hálftíma, skorum mark, en erum svo slakir síðasta korterið. Við vorum bara þokkalega heppnir með að fara þó með stöðuna 1-1 inn í búningsklefann eftir fyrri hálfleikinn.“

„Við byrjum svo mjög vel í seinni hálfleik og komumst svo verðskuldað yfir. Ég hefði svo sem getað skorað eitt til viðbótar eftir gott samspil við Kjartan.“

„En svo virðist sem að það gerist eitthvað. Þessi leikur var eins og bikarúrslitaleikur fyrir okkur enda mjög mikið í húfi. Við hleyptum þeim inn í leikinn og þeir áttu skilið að skora jöfnunarmarkið.“

„En svo settum við smá pressu á þá í lokin og það borgaði sig. Sem betur fer því það hefði verið hrikalega svekkjandi að missa af tækifæri til að ná þriggja stiga forystu á toppnum.“