Baráttan um gullskóinn er æsispennandi

Baráttan um markakóngstitilinn í Pepsi-deilda karla í knattspyrnu er æsispennandi nú þegar tveimur umferðum er ólokið.

Garðar Jóhannsson, leikmaður Stjörnunnar, stendur best að vígi fyrir lokasprettinn en hann hefur gert 13 mörk í 20 leikjum.  Kjartan Henry Finnbogason, leikmaður KR, hefur gert 12 mörk í 18 leikjum og Halldór Orri Björnsson, leikmaður Stjörnunnar, hefur gert 11 mörk í 20 leikjum.

Ef sú staða kemur upp að tveir leikmenn eða fleiri hafa gert jafn mörg mörk þegar mótinu er lokið fær sá leikmaður gullskóinn sem lék fæsta leiki.

Kjartan Henry Finnbogason verður í leikbanni hjá KR-ingum í dag þegar liðið mætir Fylki í Vesturbænum, en KR-ingar geta tryggt sér Íslandsmeistaratitilinn ef önnur úrslit verða þeim hagstæð.

Kjartan Henry getur aftur á móti náð í gullskóinn í lokaumferðinni þegar KR mætir Val að Hlíðarenda.

Garðar Jóhannsson og Halldór Orri Björnsson verða í eldlínunni í dag þegar Stjörnumenn fá Valsmenn í heimsókn í Garðabæinn.

Staða markahæstu manna:

1. Garðar Jóhannsson, Stjarnan -13 mörk í 20 leikjum

2. Kjartan H. Finnbogason, KR - 12 í 18 leikjum

3. Halldór Orri Björnsson, Stjarnan - 11 mörk í  20 leikjum

4. Tryggvi Guðmundsson, ÍBV -10 mörk í 19 í leikjum