Heimir Hallgríms: Sama spjald fyrir að opna höfuð og sparka í brúsa

Heimir Hallgrímsson var eðlilega svekktur eftir tapið gegn FH í kvöld og fannst honum hans menn eiga meira skilið út úr leiknum en það sem lokatölurnar gáfu. Hann var ekki síst ósáttur við að Hákon Atli Hallfreðsson fékk að hanga inni á vellinum fyrir að sparka í höfuð Tryggva Guðmundssonar sem þurfti að yfirgefa völlinn snemma leiks.

„Mér fannst að þó leikurinn hafi enda 4-2, þá fannst mér það ekkert sérstaklega verðskuldað. Við spiluðum fyrri hálfleikinn mjög vel en þeir skora tvö mörk án þess að varla eiga færi. Þeir fá skyndisóknir, annað eftir að við klúðrum dauðafæri. Það var svekkjandi að kom inn í hálfleik,“ sagði Heimir.

„Mér fannst mínir strákar standa sig nokkuð vel í dag. Það var skrítin umræða fyrir leik, að við myndum steinliggja hérna og ég held að við höfum sýnt annað þó hann hafi endað 4-2 á endanum.“

ÍBV missti mikið við að missa Tryggva útaf og ekki síst í ljósi þess hve varamannabekkur liðsins var þunnskipaður vegna meiðsla og leikbanna. „Þessi leikur byrjaði skringilega. Það var traðkað á hendinni á honum og í næstu tæklingu á eftir var opnaður á honum hausinn. Við fengum gult spjald fyrir að sparka í plast brúsa fyrir þremur umferðum og það er sama spjald fyrir að setja 20 til 30 sentimetra gat á hausinni á honum, ég skil ekki alveg þessar reglur.“

„Það munar mikið um Tryggva en hann átti greinilega ekki að fá að skora markið Kaplakrikavelli,“ en Tryggvi skoraði 51 mark á 5 tímabilum með FH áður en hann gekk aftur til liðs við ÍBV.

„Við vorum að reyna að rembast við að komast inn í leikinn aftur. Það er alltaf erfitt. Það hefur ekkert lið komið hingað og unnið FH í sumar og ég tala nú ekki um að hópurinn er þunnur hjá okkur. Við gátum lítið breytt í leiknum hjá okkur.  Þetta var erfitt,“ sagði Heimir sem vildi að lokum óska KR-ingum til hamingju með Íslandsmeistaratitilinn. „Ég vil óska KR og ekki síst Rúnari Kristinssyni þjálfara til hamingju með titilinn. Hann hefur komið vel fram í sumar í viðtölum og talað vel um öll lið. Það er erfitt að hata KR með hann við stjórnvölinn.“