Umfjöllun: Heimir tefldi djarft og tapaði

Stjörnumenn skutu Eyjamenn niður úr toppsæti Pepsi-deildarinnar í kvöld er þeir unnu góðan 3-2 sigur á teppinu. Stjarnan því enn í baráttunni um Evrópusæti en Eyjamenn verða að vinna KR á sunnudag til að halda alvöru lífi í titilvonum sínum.

Heimir Hallgrímsson, þjálfari ÍBV, tefldi djarft með því að geyma Tryggva Guðmundsson og Finn Ólafsson á bekknum í kvöld. Sú ákvörðun kom í bakið á honum því allan slagkraft vantaði í sóknarleik liðsins lengstum.

Tryggvi er hjartað í þessu Eyjaliði og mér finnst það óskiljanlegt að Heimir hafi leyft sér þann munað að geyma Tryggva ómeiddan á bekknum eins lengi og hann gerði.

Það kom líka ekki alvöru kraftur í sóknarleik ÍBV fyrr en Tryggvi var kominn inn og að sjálfsögðu skoraði hann. Útspil hins snjalla þjálfara Eyjamanna gekk því alls ekki upp í kvöld.

Ég tek ekkert af Stjörnumönnum sem eru með magnað lið og leikir þeirra eru ítrekað skemmtilegustu leikirnir í hverri umferð.

Leikur liðanna í kvöld var kaflaskiptur. Mikið fjör á köflum en síðan datt allur botn úr leik liðanna þess á milli.

Stjarnan nýtti föstu leikatriðin vel en sigurmarkið kemur síðan úr afar umdeildri vítaspyrnu. Ofanrituðum fannst þetta aldrei vera víti þaðan sem hann sat en Kristinn Jakobsson dómari var afar viss í sínni sök.

Þó svo vítið hafi verið umdeilt þá verður að viðurkennast að ÍBV lék alls ekki nógu vel til þess að verðskulda þrjú stig í kvöld.

Stjarnan-ÍBV 3-2

Áhorfendur: 876

Dómari: Kristinn Jakobsson 4.

Skot (á mark): 11-8 (3-4)

Varin skot: Ingvar 2 – Albert 0

Horn: 6-7

Aukaspyrnur fengnar: 9-6

Rangstöður: 5-9