Ólafur: Menn eiga að berjast fyrir stigunum

Ólafur Þórðarson, þjálfari Fylkis,  segir að Þórsarar hafi barist meira fyrir stigunum í dag og því átt sigurinn skilinn. Þór vann Fylki 2-0 í dag.

“Þetta var baráttuleikur en okkur gekk illa að skapa okkur færi. Það vantaði ákveðin gæði í leikinn. Við fengum þó tvö dauðafæri en svona er þetta. Það var mikið af ungu leikmönnum að spila hjá okkur og við lítum kannski á endinn á þessu Íslandsmóti sem reynslu fyrir þá.”

“Við höfum þannig séð að litlu að keppa, við siglum bara um miðja deild og eru ekkert að fara að falla. Það eru margir leikmenn meiddir hjá okkur og það vantar eina sex leikmenn sem byrjuðu mótið í liðinu.”

“Ungu strákarnir hafa verið að standa sig ágætlega en þetta er farið að taka sinn toll, það er erfitt að spila marga leiki á stuttum tíma á svona miklu tempói.”

“Mér fannst Þór alveg eins eiga sigurinn skilinn, þeim vantaði stigin meira og þeir börðust meira fyrir þessu.”

Ólafur segir að þar sem liðið hafi að litlu að keppa sé hugarfarið ekki alveg rétt.

“Það er skiljanlegt en maður vill auðvitað að menn berjist fyrir öllum stigum. Ef menn ætla að vera almennilegir fótboltamenn verða þeir að vera tilbúnir til að fórna sér og berjast í hvert einasta skipti,” sagði Ólafur.