Páll: Ekki þetta tal, í Guðs bænum!

“Þetta var sætur sigur,” sagði Páll Viðar Gíslason, þjálfari Þórs eftir sigurinn gegn Fylki í dag. Þór vann með tveimur mörkum gegn engu.

“Við uppskárum eftir því sem við lögðum upp með. Við lögðum mikið í þennan leik og  okkur var skítsama hvernig stigin kæmu ef við ynnum leikinn. Það sást kannski á gæðunum.”

“Viljinn og baráttan var til fyrirmyndar. Það er það sem við þurfum að gera til að vinna leiki. Við viljum líka sýna að við getum spilað flottan fótbolta en þetta Barcelona-grín sem er í gangi hérna innanbúðar er bara af því við erum ekki þekktir fyrir að spila eins og þeir,” sagði Páll léttur.

“Það var gaman að mæta Óla Þórðar og strákunum hans, liði sem er tilbúið til að hlaupa á vegg ef því er að skipta.”

Hann vill þó ekki fagna of snemma því að sæti þeirra í deildinni sé tryggt. “Í Guðs bænum ekki segja þetta. Það hefur verið gert áður í sumar en svo komu nokkrir tapleikir í röð. En við erum klárlega í betri stöðu en fyrir umferðina,” sagði Páll.