Willum: Gæti verið dýrmætt stig

Willum Þór Þórsson þjálfari Keflavíkur var ánægður með leik síns liðs gegn Breiðabliki í kvöld og þó hann hefði viljað öll stigin tók hann stiginu sem vannst fegins hendi.

 

„Ég hugsa að þetta verði dýrmætt stig þegar uppi verður staðið. Við virðum punktinn. Bæði lið lögðu allt í sölurnar meðvituð um að þrjú stig myndu hjálpa mikið en bæði lið voru þétt og öguð í skipulagi. Þau voru fljót niður að loka og þétta,“ sagði Willum eftir leikinn sem fór 1-1.

„Ég er ánægður með Keflavíkurliðið í kvöld. Menn börðust eins og ljón allan tímann og sköpuðu fullt af færum. Við fórum illa með dauðafæri en það er ekki hægt að skammast yfir því, maður er frekar súr þegar menn skila sér ekki í færin.“

Willum hefur verið tíðrætt í sumar um að Keflavík hafikastað klaufalega frá sér stigum í fjölda leikja. Hann sagði lið sitt hafa farið vel yfir það og rætt það mikið. „Ég var virkilega ánægður með að við vorum meðvitaðir með það að gefa ekki frá okkur punktinn. Það eru mikil gæði í Blikaliðinu, þú mátt aldrei tapa einbeitingunni, þá geta þeir skapað með stuttu spili og hröðu. Þess vegna er ég mjög ánægður með okkur í Keflavík, að halda vaktina út,“ sagði Willum að lokum.